ادخل قسم جغرافيا ؟ يفرق ايه عن الأقسام التانية - اجابة على أسئلتك

 

  ادخل قسم جغرافيا ؟ يفرق ايه عن الأقسام التانية - اجابة على أسئلتك

ليه ادخل قسم جغرافيا ؟ يفرق ايه عن الأقسام التانية - اجابة على أسئلتك

كتير من طلاب الثانوية العامة بيدوروا على إجابة للسؤال دا ... ليه أدخل قسم جغرافيا ؟
في المقال دا هنتكلم معاكم بطلاقة وهنحاول نجاوب على سؤال محير ناس كتير وإجاباته متعددة جدا .. ليه أدخل قسم جغرافيا وأيه هي مميزات القسم ؟

قسم الجغرافيا :

هو واحد من أقسام كلية الآداب ، وكمان في العديد من كليات التربية .. تخصص الدراسات الاجتماعية ، او تخصص الجغرافيا منفصل .. القسم بيهتم بتدريس الجغرافيا بمختلف مجالاتها سواء كانت الجغرافيا الطبيعية أو الجغرافيا البشرية والاقتصادية وطبعا مننساش المساحة ونظم المعلومات الجغرافية ..
قسم بيني بيجمع التخصصات المختلفة ، يعني تلاقي نفسك بتدرس جزء من هندسة زي المساحة والرياضة وخلافه ، تلاقي نفسك بتدرس من علوم زي علوم الفضاء والأرض والجيولوجيا ، تلاقي نفسك بتدرس من زراعة زي جغرافية الزراعه والانتاج الحيواني ، تلاقي نفسك بتدرس في سياحة في نقل في طرق في صناعه في مناخ في تربة في بيئة .. فعلا علم بيني وبيجمع بين تخصصات كتير جدا ...

ايه هي شعبة المساحة؟

شعبة المساحة دي شعبة داخل قسم الجغرافيا ، بيقدر الطالب يدخل شعبة المساحة ونظم المعلومات الجغرافية غالبا في سنه تالته وبشوية شروط بسيطة على سبيل المثال أن الطالب يكون من ال٥٠ طالب الأوائل في سنة أولى وتانية أو من ال ٤٠ الأوائل طبعا حسب كل قسم وكل جامعه وعدد المطلوبين للشعبة دي، شعبة متميزة جدا وبتدرس مواد متخصصة جدا زي نظم المعلومات الجغرافية والاستشعار عن بعد والمساحة والخرائط ومساقط الخرائط .. يعني هتكون اخصائي مساحة متميز جدا لما تدخل الشعبة وكمان تشتغل شوية على نفسك وتهتم بالبرمجيات والتدريب الصيفي وخلافه ..

الشعبة العامة !

ناس كتير بتفتكر ان الشعبة العامة في اقسام الجغرافيا بتكون شعبة مهمشة ومش بتدرس بنفس الامكانيات اللي بيدرسوا بيها شعبة الخرائط ... الكلام دا مش صح ، اللي في الشعبة العامة بيدرس كتير من مواد شعبة الخرائط والاختلاف بيكون في مواد بسيطة جدا لا تتعدى ٣ مواد في الفصل الدراسي أو السنه الواحدة ، كمان اللي في شعبة عامة بيشتغل في مجال الخرائط والمساحة وبيدرس مواد في نظم المعلومات الجغرافية وممكن يشتغل على نفسه أكتر ويبقى افضل بكتير من طالب في شعبة الخرائط ومبيتدربش ولا مهتم ...

ممكن اشتغل ايه لما اتخرج من جغرافيا ؟

الصراحة ان قسم الجغرافيا دا قسم مميز جدا ... وبيأهل الطالب او الخريج بشكل كويس أوي لسوق العمل وكمان في مجالات كتير جدا هنحاول نلخص المجالات دي بشكل مبسط ..
تقدر تشتغل من قسم الجغرافيا في كتير من الهيئات والإدارات نذكر منها هيئة المساحة ، وهيئة الاستشعار عن بعد،وهيئة الارصاد الجوية 
تقدر كمان من جغرافيا تشتغل في الجهاز المركزي للتعبئة العامة والاحصاء ،وكمان في المحليات 
تقدر من قسم الجغرافيا تبقى مدرس جغرافيا أو دراسات اجتماعية 
تقدر تشتغل في مجال المساحة بالشركات المختلفة زي المقاولون العرب وحسن علام واوراسكم وغيره
تقدر تشتغل في مجال نظم المعلومات الجغرافية وصناعة الخرائط والاستشعار عن بعد

ليسانس المساحة ونظم المعلومات الجغرافية!

دا برنامج فتح من سنتين او اكتر في كتير من الجامعات المصرية ،زي كلية الاداب جامعة القاهرة ..  البرنامج دا بيخليك متخصص في المساحة والخرائط ونظم المعلومات الجغرافية والاستشعار عن بعد ، وكمان من أول سنه يعني مفيش شعبة في البرنامج دا بالعكس الطلاب كلهم بيكونوا نظم معلومات ومساحة .. مدة الدراسة فيه اربع سنوات برضو مقسمة على ٨ فصول زي العادي، بيختلف عن العادي في نظام التشعيب وكمان انه بمصروفات اعلى شوية والمصروفات دي بتعلن عنها كل كلية في بداية التقديم ..
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -