نصائح لطلاب قسم الجغرافيا .. كيف أكون متميز في الجغرافيا؟

 

نصائح لطلاب قسم الجغرافيا .. كيف أكون متميز في الجغرافيا؟



في المقالة دي هنحاول نقدم مجموعة مهمة جدا من النصائح لطلاب قسم الجغرافيا، أو لطلاب الثانوية العامة اللي هيدخلوا جغرافية .. هنحاول نعمل المقالة بلغة بسيطة وسهلة .. بلغة المصريين في المقام الأول ونوضح ايه هي أهم النصائح علشان أكون متميز في مجال الجغرافيا .. أو في قسم الجغرافيا وأقدر أحقق أهدافي بسهولة .. 
النصائح ممكن تنطبق على أقسام تانية غير الجغرافية .. أو في بعض منها هينطبق على مجالات وتخصصات وأقسام تانية، لو انت مهتم بالموضوع تابع معانا المقالة للنهاية علشان توصل لأقصى استفادة .
مفيش شك أن كل واحد مننا بيدور على التميز والنجاح في مجاله ، وأي طالب بيكون هدفه الأساسي النجاح وبدرجات وتقديرات عالية ، والتعلم بأفضل شكل ممكن وأبسط طريقة، وأكيد يلاقي فرصة عمل مناسبة لما يتخرج .
سواء كان قسم الجغرافيا هو اختيارك ، أو التنسيق اللي دخلك جغرافيا زي ما كتير من المصريين بيقولوا أن التنسيق والثانوية العامة هما اللي حددوا دخولهم لكليات معينة أو أقسام معينة ، أو تخصصات غير اللي كانوا بيخططوا ليها .. لكن النصائح دي هتخليك تتجاوز دا وتخليك متميز في مجالا ان شاء الله .

نصائح المحاضرات لطلاب الجغرافيا


النصيحة الأولى أنك تكون دايما حريص على حضور المحاضرات وبانتظام دا لأن دايما المحاضرات في الجامعة بيكون ليها دور كبير جدا في أن المعلومة توصلك وانك تكون فاهم كل شيء، مش بالشرط كل شيء لكن حضور المحاضرات وانك تاخد المعلومة من شخص متخصص وهنا نقصد دكتور الجامعه دا أفضل بكتير من أنك تتعلم لوحدك .. او طالب زميلك يشرحلك 
، ودا سبب مقنع انك تكون حريص جدا على كل المحاضرات في مواعيدها .. سواء كانت المحاضرات دي علمية أو نظرية او تطبيقية فالقاعدة الأولى أنك تحضر كل المحاضرات .
خليك حريص دايما أنك تدون مع الدكتور الملاحظات واللي بيتشرح ودي نقطة مهمة جدا، مش كل اللي بيتشرح في المحاضرات بيكون في الكتاب ودا يخليني احاول قدر المستطاع اسجل وادون مع الدكتور ، بجانب رسم الخرائط ورا الدكتور والأشكال التوضيحية والرسوم والمصطلحات الانجليزية وكل حاجه بتتشرح أكيد لازم تكون مركز فيها وتحاول تدونها وتسجلها .

نصائح البحث 

البحث شيء مهم جدا جدا .. البحث بيبقى من خلال المكتبات ومن شبكة المعلومات أو الإنترنت ، لازم تنزل المكتبة باستمرار وتبحث وتطلع وتقرأ في الكتب والمراجع علشان تستفيد أكتر ، كمان كتير جدا من المواقع بتوفر كتب إلكترونية بصيغة pdf في تخصصات الجغرافيا ونظم المعلومات الجغرافية والاستشعار عن بعد والجيوماتكس ،ننصحك بالمكتبات اللي جوا كليتك أو جامعتك والمكتبات المتخصصة زي مكتبة الجمعية الجغرافية المصرية ودي مقرها بداخل مجلس الشورى بشارع محمد محمود في وسط البلد او التحرير، والمكتبة المركزية بجامعة القاهرة، ومكتبة مصر العامة، ومكتبة كلية الآداب بجامعة عين شمس وحلوان ، وغيرها كتير من المكتبات ، اطلاعك على الكتب والقراءة باستمرار هيساعدك في اعداد ابحاثك وتكليفاتك وتقاريرك وكمان هيساعدك كتير في فهم اجزاء المنهج وتوسيع أفكارك .

التعلم الذاتي في الجغرافيا

مهم جدا تفهم موضوع التعلم الذاتي وأنك تعلم نفسك بنفسك ومتعتمدش ان المعلومة هتوصلك كاملة من المحاضرات ومن الجامعة ..علم نفسك بنفسك من خلال منصات كتير جدا بتوفر كل دا ، وعلى رأسها اليوتيوب .. طبعا اليوتيوب أصبح مجال واسع جدا للتعلم الذاتي تقدر من خلاله تتعلم نظم المعلومات الجغرافية خطوة بخطوة وتتعلم المساحة والأجهزة المساحية، تتعلم رسم الخرائط بالطرق اليدوية وبالطرق الالكترونية .. اليوتيوب من اشهر المنصات اللي كتير مننا للأسف بيستغلها بشكل خاطيء وبنضيع وقت كبير جدا وأحنا بنشوف فيديوهات مش هتنمي قدراتك ولا تفيدك .. لكن لو دورت على قنوات تخص مجالك وهنا بنتكلم على الجغرافية هتلاقي كتبر جدا من القنوات العربية في مجالات وتخصصات الجغرافية ونظم المعلومات الجغرافية، وكتير من القنوات الأجنبية اللي تقدر برضو من خلالها تتعلم تقنية أو مهارة معينة ، دا بالإضافة إلى منصات التعلم عن بعد واللي بتتيح كورسات ودورات تدريبية في مجالات الجغرافيا ونظم المعلومات الجغرافية والاستشعار عن بعد .

التدريب الصيفي 

متفوتش فرصة التدريب الصيفي وأنت طالب في قسم الجغرافية لأن دي فرصة كبيرة جدا، أنت طالب تنتمي لجامعة معينة ودا بيسمحلك أنك تنزل تدريبات صيفية في كتير من الشركات والهيئات وممكن يكون بأسعار لا تقارن بالخريجين يعني رسوم بسيطة، ممكن تدور على شركات المقولات وتتعلم فيها المساحة على أرض الواقع مثل المقولون العرب وحسن علام وجابكو وأوراسكوم، أو هيئة المساحة ، وهيئة الاستشعار عن بعد وعلوم الفضاء، والجهاز المركزي للتعبئة العامة والإحصاء، والشركات الخاصة والمطار وهيئة المساحة الجوية وكل الشركات دي والهيئات بتوفر خدمة التدريب الصيفي لطلاب قسم الجغرافيا .

اتعلم مناهج البحث 

لازم تتعلم أسس ومناهج وأساليب البحث ، نوضح الفكرة ببساطة .. مناهج البحث واساليبه هو ازاي اتعلم أني أعمل بحث أو تقرير علمي سليم ومكتمل ودا لأكثر من سبب .. الأول أني أعمل تكليفاتي بنفسي ودا ينمي عندي مهارة البحث ، التاني أني ممكن أكمل في الدراسات العليا ماجستير ودكتوراه ويكون عندي الخبرة الكافية أني أعمل رسالة علمية لأني اتعلمت مناهج وأساليب البحث ، ودي ليها كتب كتير لا تعد ولا تحصى وكمان دروس وشروحات كتبر، هتتعلم تعمل صفحة غلاف ومقدمة وخاتمة والبحث والمراجع والمصادر، تتعلم تعمل استبيان ناجح وسليم في أي مجال من مجالات الجغرافيا ، تتعلم تصور وتنمي مهاراتك في التصوير، كل دا هيخليك جاهز دايما أنك تستمر وتكون ناجح والأمر بسيط.

مهارات الكمبيوتر مهمة للجغرافي 

أكيد مهارات الكمبيوتر مهمة في جميع مجالات الحياة، فعلا الحاسب الالي والتقنية هي لغة العصر وأصبح لا غنى عنها في أي مجال من مجالات العلم والحياة والعمل ، كمان مهمة في مجال الجغرافيا لأن الجغرافيا ونظم المعلومات الجغرافية بالأخص تعتمد كليا على التقنية والبرمجيات لاعداد واخراج الخرائط، ومجال الاستشعار عن بعد بيعتمد على التقنية وعلوم الحاسب الالي في تحليل المرئيات الفضائية والصور الجوية، كل دا يخليك لازم تتعلم مهارات الحاسب الالي من خلال دورة مثل دورة التحول الرقمي او من خلال التعلم الذاتي تقدر تطور مهاراتك في استخدام الحاسب الألي .

اللغة مهمة لطلاب الجغرافيا

مهم جدا تهتم باللغة الانجليزية ، هي اللغة الأولى في العالم مع كل التقدير للغتنا العربية لكن لازم اطور اللغة الإنجليزية قدر المستطاع دا هيفيدك في دراستك وهيفيدك في مجال عملك بعد التخرج، اللغة الانجليزية هتفتحلك مجالات عمل كتبر أكتر من الشخص اللي معاه لغة واحدة أو مكتفي باللغة العربية، مهاراتك كمان في نظم المعلومات الجغرافية هتتطور لأن اللغة الانجليزية عندك كويسة .


حدد هدفك من البداية 

مهم جدا تحدد هدفك من البداية هل أنت مهتم أكتر بنظم المعلومات الجغرافية، ولا مهتم بالمساحة، ولا الخرائط فقط .. تحديد الهدف يخليك تركز أكثر على هدفك وتدي وقت كبير للحاجات اللي تحقق هدفك، مع الاهتمام طبعا بالجوانب الأخرى لان كلها عناصر مترابطة لكن يكون تركيزي بنسبة كبيرة على هدفي اللي حابب أني أتخصص فيه في المقام الأول .
مثال: لو أنا نفسي أكون مساح هدي اهتمام كبير للمساحة والأجهزة المساحية وأنزل تدريب مساحة وابحث عن شركات المساحة اللي ممكن أتدرب فيها كل دا بجانب نظم المعلومات لكن هدفي الرئيسي المساحة .

اشتغل على نفسك 

متنساش أنك دخلت الكلية علشان تبقى إنسان ناجح وتحقق أهدافك وطموحاتك ، تتخرج تقدر تلاقي فرصة عمل مناسبة ، متخليش أي شخص يقلل منك ولا من طموحاتك ، الحلم أو الهدف محتاج معافرة وصبر وسعي لازم تشتغل على نفسك وتتعب ووضحنا نقط كتير في الأجزاء السابقة محتاجة منك تعب ومجهود علشان في الأخر تفرح بتحقيق حلمك ووصولك لهدفك .
دايما خلي أهدافك قدام عينك واشتغل على نفسك باستمرار ، وفكر نفسك بكل طموحاتك وشوف اللي سبقوك وبالأخص الناجحين منهم وخليك واثق أنك في يوم من الأيام تقدر تكون أفضل منهم .

في الأخر خليك فاكر أن الجامعة دا مكان للعلم مش مكان للترفيه أو مجرد خروج وصحاب ولمة ، الهدف الأول هو التعليم وبعدين أعمل صحاب ولمة بس خليها لمة وصحبة صالحة تدفعك لقدام علشان تحقق حلمك مش صحبة سوء تدمرك وأنت الخسران .

يا ريت تكون المقالة مفيدة
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -