قسم الجغرافيا (مميزاته، الشعب، مجالاته) .. تعرف على اقسام الجغرافيا

 

 قسم الجغرافيا (مميزاته، الشعب، مجالاته) .. تعرف على قسم الجغرافيا



قسم الجغرافيا واحد من أعرق واقدم الأقسام العلمية في كليات الآداب بالجامعات المصرية والحكومية منها على وجه التحديد . كمان قسم الجغرافيا موجود في العديد من كليات التربية تحت مسمى الدراسات الاجتماعية وبتضم غالبا الجغرافيا والتاريخ .

أقسام الجغرافيا 

موجودة غالبا في كل كليات الآداب بالجامعات المصرية ، وكما وضحنا فهو من أقدم وأعرق الأقسام على الإطلاق داخل كليات الآداب ، ويتطور قسم الجغرافيا بشكل ملحوظ من خلال التخصصات والشعب داخل القسم .

المواد الدراسية بأقسام الجغرافيا 

تتنوع الدراسة في أقسام الجغرافيا ما بين الدراسة النظرية والدراسة العملية، يعني هتدرس مواد نظرية وبتختلف مسمياتها من كلية لكلية ومن قسم لقسم على سبيل المثال هتدرس مواد مثل جغرافية المناخ وممكن تلاقيها في كليات واقسام تحت مسمى الجغرافية الطبيعية، كمان البنية والتضاريس والتربة والجيولوجيا والجيمورفولوجيا أو علم أشكال سطح الأرض، مواد دراسية نظرية لكنها ممتعة جدا للراغبين في دراسة التخصصات دي وكمان مواد زي جغرافية السكان والفروع الاقتصادية مثل السياحة والتجارة والزراعة والصناعة والنقل والمواصلات والتجارة الالكترونية وغيرها طبعا من المقررات .

بخلاف كتير من المواد العملية مثل المساحة والجيوماتكس والخرائط ونظم المعلومات الجغرافية والاستشعار عن بعد، تخصصات اصبحت مطلوبة بشدة في سوق العمل فاغلب الشركات تعتمد على هذه التخصصات مثل شركات المساحة والمقاولات، كمان نظم المعلومات الجغرافية دخلت بشدة في مختلف مجالات الحياة الطبيعية منها والبشرية .. يعني تخيل كدا تبقى اخصائي مساحة او مساح .. او تكون متخصص في مجال نظم المعلومات الجغرافية gis.


مميزات قسم الجغرافيا

واحدة من أهم مميزاته انه بيضم الدراسات النظرية والعملية التطبيقية، كمان كتير من مقررات الدراسة بتعتمد على الميدان أو الحقل ، مع دراسة جميلة للظاهرات الطبيعية المختلفة في اقاليم مختلفة ودراسة كتير من الظاهرات البشرية والاقتصادية،يعني مش مجرد دراسة فقط في المدرجات والقاعات لا الدراسة في القسم متنوعة ..

شوية بتدرس نظري وقاعات ومحاضرات ، بجانب الدراسة العملية ورسم الخرائط والعمل على برامج نظم المعلومات الجغرافية المختلفة ، واللي بتكون مطلوبة لسوق العمل وكمان تقدر تتعلمها وتتقنها وتكون متميز جدا فيها .

الشعب في قسم جغرافيا 

التشعيب في قسم الجغرافيا بيختلف طبعا من كلية لكلية، كليات بيكون فيها ٣ شعب وهي الشعبة العامة وشعبة المساحة وشعبة الخرائط ، وبعض الكليات والاقسام بتدمج المساحة والخرائط ونظم المعلومات في شعبة واحدة .

غالبا بيبدأ اختيار الشعبة في المستوى الثالث يعني وانت داخل سنة تالتة بتختار شعبة عامة ولا شعبة خرائط، ودا حسب مجموعة من الشروط واللي بتختلف من جامعه للتانية وغالبا بيكون من ضمن الشروط انك تجيب مجموع معين في سنة أولى وسنة تانية ، او تجيب مجموع في مواد معينة واللي عنده هدف هيقدر يحقق الشروط دي بسهولة جدا ..

شعبة المساحة والخرائط ونظم المعلومات الجغرافية : تتميز عن الشعبة العامة في ان أغلب المواد اللي هتدرسها هتكون في التخصص، مواد خاصة بالمساحة ، او الخرائط ، او مواد نظم المعلومات الجغرافية .. يعني هتدرس في سنة تالتة وسنة رابعة مواد متخصصة اكتر ، علشان تكون مستعد للتخرج وتنمية قدراتك وكفائتك لسوق العمل حسب التخصص.

من التخصصات والمواد المهمة في قسم الجغرافيا، نظم المعلومات الجغرافية، والاستشعار عن بعد وعلوم الفضاء ، والخرائط الجيولوجية، والمساحة، والخرائط الطبوغرافية، والخرائط الكنتورية، والجيوماتكس ، وتخصصات من هذا القبيل .. دا جزء من المواد اللي ممكن تدرسها في التخصص .

الأجهزة المساحية 

في قسم الجغرافيا هتتدرب على اجهزة مساحية مهمة منها اجهزة بسيجة مثل البوصلة وشريط القياس ومجموعة متنوعة من الأدوات، بالإضافة الى الأجهزة المتطورة ومنها الميزان والتوتال استيشن وعيرها من الاجهزة، ودي الاجهزة المستخدمة في مجال المساحة والانشاءات والطرق والتخطيط والتعمير وغيرها من المجالات .

خريج الجغرافيا 

خريج الجغرافيا أمامه مجموعة كبيرة من المجالات ، منها ما هو اكاديمي مثل التدريس .. يعني ببساطة تقدر تتخرج من جغرافيا وتبقى في مجال التدريس وتقدر تصنع اسم ليك في المجال وبقوة، ولو بتدور على مجال المساحة يبقى لازم تكون متميز غي المجال وتتعلم كويس على الاجهزة المساحية بجانب الكورسات والدورات التدريبية ، ولو حابب مجال نظم المعلومات الجغرافية تقدر تزود معلوماتك وتتعلم بنفسك من خلال اليوتيوب والشروحات والكورسات والكتب والمراجع دا طبعا بجانب دراستك في قسم الجغرافيا ، ومن الجهات والهيئات اللي ممكن تلاقي فرصة عمل فيها وهنا بنتكلم عن مصر: الهيئة القومية للاستشعار عن بعد، الجهاز المركزي للتعبئة العامة والإحصاء، هيئة المساحة، الارصاد الجوية، الطرق والنقل، شركات المقاولات العامة، شركات المساحة وغيرها كتير من المؤسسات .


نتمنى ان تكون المقالة مفيدة 

حاولنا التوضيح وبلغة بسيطة


تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -